2
إوعى.. حاسب..

من ثورة البركان

دا شباب بيموت علشان

الشعب يعيش في أمان

إوعى.. حاسب..

تخرج م الميدان

قبل ما ييجي اليوم

ونحاسب كل مدان

إوعى.. حاسب..

من وعد الألعبان

في الزنقة بيبقى صديق

والراحة يبان تعبان

إوعى.. حاسب..

تسمع أكاذيب لجبان

لو راجل قلبه شجاع

كان ينزل للميدان

3

هاتوا دم شهيد

سالي وسعيد

واتحنوا وحنوا جميع لحباب

سبحان من سبب دي الأسباب

اللـــــــــــــــــــــــــــه

الله ع الطيب

دا الجرح يطيب

والقلب الضاق

أصبح مشتاق

واسع ورحيب

واليوم الوقفه

وبكره العيد

هاتوا دم شهيد

واتحنوا وحنوا جميع لحباب

4

يا شهيد الثورة المصريه

سجل بدماك الورديه

حدوتة أحمس وبهيه

حدوتة جرجس ومحمد

وصمود الوحدة الوطنيه

فلتحيا الثورة المصريه

وليحيا الجيش والحريه

وإرادة مصر الحديديه

وليسقط كل الحرميه