جددت والدة الشاب عبدالحميد محمد عبدالسلام المختفي قسريا منذ 14 أغسطس 2013 وفض ميدان رابعة العدوية، السؤال عن فلذة كبدها الذي أكمل بحسب رسالة أخيرة على حسابها ٣٠سنة، سجلته أيضا على هاشتاج #اوقفوا_الاختفاء_القسري، وقالت: "كل سنه وانت حر التلاتين سنه دول منهم ٨سنين و٦شهور اختفاء قسري يعني مشفتش ابني ولا اعرف عنه أي حاجه ولا حتي سمعت صوته ".
وأضافت "٨سنين و٦شهور مفيش اي كلام يوصف اللي احنا فيه ومازلنا فيه من حرمان ووجع وألم ليه ! ليه ياسجان هو انت مش أنسان مش بتحس زينا كدا ولا انت نوعيتك ايه طب لو انت ف مكانا وابنك بعيد عنك متعرفش عنه أي حاجه  لو غاب عنك ساعه ولا حتي ساعتين متعرفش مكانه ولا تعرف عنه أي حاجه هيبقي قلبك محروق اد ايه اكيد هتموت زينا كده ما احنا ميتين حسوا بينا والله احنا بردو زيكم بني ادمين ".
وسجلت الأم المكلومة استغاثتها تحت هاشتاجات منها؛ #أبني_فين و#تمن_سنين_٦_شهور_اختفاء_قسري، و#عايزه_اشوف_أبني، و#الحريه_لعبدالحميد.
وعبدالحميد محمد من مركز الحامول، محافظة كفر الشيخ، وهو طالب بكلية الشريعة والقانون، جامعة الازهر، وكان آخر اتصال الساعة 4:30 يوم 14 أغسطس 2013 أثناء عملية فض اعتصام رابعة العدوية من قبل قوات الأمن حيث طمأنهم على نفسه لينقطع الاتصال بعدها ولم يستدل علي مكانه حتي اللحظة.