هتتحرر.. في يوم ما الشعب هيقرر وينفد من جدار الخوف
هتتحرر.. في يوم ما قلوبنا هتنور وتقدر م الغيامة تشوف
في يوم ما نحب بعضينا في يوم ما نِبر أهلينا
في يوم ما هتقدر البسمة تكسر صخرة الأحزان
في يوم ما هترجع الوحدة تلم الشمل والأوطان
*****
هتتحرر.. في يوم ما نشم أنفاسنا وناكل قوتنا من فاسنا
نرفض فكر أعدائنا ويبقى الرأي من راسنا
هتتحرر.. في يوم ما الشرع يحكمنا ويبقى عالعباد ماشي
ولما نجهز الأرواح ويتوب الشارد العاصي
في يوم ماهنملا مساجدنا ويوم ما نصلي ونكبر
ساعتها.. أكيد هتتحرر
هتتحرر.. في يوم ما قضيتك تبقى بجد قضية الأيام
ولما قضيتك تبقى بصدق قضية الأحلام
ويوم ما الحلم يتحقق يمشي بحبنا لقدام
بروح نسمع ندا الجنة ويوم ما الفهم يتغير
ساعتها.. أكيد هتتحرر
ولما فجِّرنا يشقشق ويتعطر بريحة العيد
ولما نحنِّي أراضينا وساحاتك بدم شهيد
ويوم ما الصيحة هتدوي وهتقوي قلوب ملايين
ويومها هيرجع المختار وترجع رُوح صلاح الدين
هتتحرر.. في يوم ما هاخاف على جاري وأنوَّر ليله نهاري
ويوم ما نربي أولادنا على صوت الندا الغالي
ويوم هتسمع الأجيال لألحان حبنا العالي
ونسقي بيها أمانينا ويومها الحب هيزهر
ساعتها.. أكيد هتتحرر
هتتحرر.. في يوم ما هنهزم الأحزان ويوم ما هيركع السجَّان
ويوم ما هنهدم الزنازين ونرجع في حمى الأوطان
في يوم ما وطنا هيقرر لا بد يا أقصى تتحرر
