ولما هل فجر الخير
من التحرير نبت في أصلك الطيب بذور إنسان
وشفت الثمرة ناس مخلوقة في الميدان
وشفت كمان شباب إخوان
عاهدوا الرب على النصرة ماهم شهدا
ومش دلوقتي.. قبل زمان
وقابلو بصدرهم رصاصات
وشفت كمان ناس تانيين من الحركات
ودول عشقوكي مش حركات
هنا كفاية قالو كفاية.. ومش هنحيد
هنا أبريل هنيالك خالد يا سعيد
عريس الجنة ليلة العيد هنا الوطنية للتغيير
ضد القهر والتزوير
وشفت كمان بنات أمامير
لكن من جوه أحلى كتير
ساترة جمالها بخمارها
لكن كاشفة سواعد الخير
وتهتف عفتك تدوي بإصرارها
وتسقط دولة الظالم بسراديبها وأسرارها
وشفت كمان نسا صحيت على نارها
بفقد الابن والوالد.. بقطع الرجل والساعد
وكل مايفقدوا واحد
بتكسب مصر 100 واحد
ما هو الأصل الكريم بيبان
وشفت كمان قميص عثمان
بيحلف بيه كام واحد من الأذناب
من القطعان وكام فتوى من إياهم
صنيعة عمنا التعبان
لكن للحق شفت كمان
سيدنا الشيخ قرضاوي متمسك بأصل الدين
صحيح الدين ومش ناوي يعلي الدنيا عـ الآخرة
وفاهم إن دنيتنا في لقمتنا
وهدمة بس ساترانا
وأنا أصلي يا مولانا
من المجاذيب لكلمة حق
طالعة تشق
لما يعز قول الحق
لما الحق يبقى غريب.. ولا تلاقي يراعيه إنسان
وشفت كمان شهيدنا الحي ابن النيل.. حليم قنديل
شريف في كفاحه وجهاده
جيل ورا جيل مراده
الحق ويا الخير بحب صراحته وعناده
وكلماته تنور زي 100 قنديل
وشفت كمان بنت النجم نوارة
بتطلب ثار
وقايدة النار
تزكيها لحون موسيقار
عارفين مين.. أكيد عمار
وقف ضد الفئة الباغية بيستلهم خطى عمار
وناس شُرفا ونوارة حسن نافعة وجورج إسحاق
وأبو العز الحرير سبَّاق
جمال القطب.. شيخنا القطب في الميدان
وشفت كمان عيالنا مشاركة في الثورة
وحالفة تطهر الحاضر تعدي الغيم وجايبة الفجر من بكرة
بشرف القصد والفكرة وآهي ذكرى.. لكل عبيده إنس وجان
وشفت كمان بلدي اللي قريت عنها.. بتتزين ليوم زانها بتاج الخير
ودراته شهيد وأسير
ما هو إنتي يا مصرنا أميرة.. وأنا المصري بطبعي أمير.
----------
